Cal é o concello máis solleiro de Galicia? Cal é a rúa da túa cidade que recibe máis luz solar? Remátase o debate porque a resposta non só é sinxela, tamén é doada de atopar. Grazas á aplicación ShadeMap calquera pode comprobar o número de horas de sol anuais sobre un punto concreto do mapa. De feito, funciona de maneira semellante ao Google Maps: desprázaste sobre unhas coordenadas e, automaticamente, xérase un resultado. Ademais, a aplicación permite descargar un documento no que se detallan os minutos de sol directo por día.
No que respecta a Galicia, os resultados son fáciles de comprobar. Se unha se sitúa en plena Praza do Obradoiro, diante da catedral de Santiago, comprobará que hai 125 días, 15 horas e 5 minutos de sol ao ano. Unha cifra que diminúe considerablemente na Porta do Sol de Vigo, con tan só 95 días, 20 horas e 4 minutos de sol. De todas formas, as cifras varían dun punto a outro da cidade. No alto do Monte do Castro, na fortaleza, o número ascende a 183 días, 20 horas e 43 minutos de sol. Unha cifra moi semellante á da Torre de Hércules, na Coruña, con mesmo número de días de sol que o Monte do Castro. Pero se unha se despraza, por exemplo, ao estadio de Riazor, a cifra descende a 114 días, 14 horas e 9 minutos.
O deseñador web Ted Piotrowski está detrás de ShadeMap. Segundo el mesmo explica, a idea de crear esta aplicación xurdiu mentres paseaba pola montaña. “Notei que o terreo cambiaba drasticamente a cantidade de luz solar ao longo do camiño. Pregunteime se era posible simular este efecto nun mapa”, sinala na súa presentación en Github. O seu obxectivo é que os usuarios de ShadeMap poidan atopar sombra en calquera lugar e en calquera momento. Unha ferramenta de gran utilidade de cara ao verán para facerlle fronte da mellor maneira posible ás horas de máis calor, dado que tamén permite coñecer a evolución do sol e a sombra ao longo do día.
