Únete á nosa canle de Whatsapp
Na semana na que comezou a primavera, os termómetros volveron marcar rexistros moi elevados en Galicia. Despois de que o sábado fora Ribadavia a que liderase a lista de temperaturas máis altas de España, segundo a rede da Axencia Estatal de Meteoroloxía, o domingo foi Vilagarcía de Arousa, con 27ºC, a que marcou o rexistro máis alto do día. E seguida, precisamente de Ribadavia, que quedou en 26,9ºC.
O salientable, con todo, non quedou aí. Xa en plena primavera, e un mes despois das temperaturas que chegaron a situarse, en pleno inverno, en cifras semellantes ás das Illas Canarias, 7 das 10 localidades de España con temperaturas máis altas estiveron en Galicia. Foron, ademais de Vilagarcía e Ribadavia, Ponteareas (26,8ºC), Boiro (26,5ºC), Ourense (26,2ºC), O Carballiño (25,9ºC), e Padrón (25,6ºC). É salientable que todas as máximas se produciron a partir das 18 horas; e mesmo en Ourense, O Carballiño e Padrón, ás 21 da noite.
No medio deste top 10 copado por Galicia, só apareceron tres localidades catalás: Tortosa (3º), Espolla (7º) e Girona (9º).
Rede de MeteoGalicia
Pola súa parte, na rede de estacións de MeteoGalicia houbo varios lugares que estiveron aínda con máis calor. Catro deles chegaron aos 28ºC. Foron O Viso-Redondela e Leiro (28,4ºC), Remuíño-A Arnoia (28,3ºC), e e Ourense-Estacións (28ºC). E como se pode ver no mapa, gran parte do país superou os 20ºC durante o domingo.
